BI HEZARAN ....

BI HEZARAN  ....

Bi hezaran sal qedîyan

Kurd dinav kulande man

Kes bi êşa wan nizane

Li Dermanê xwe gerîyan

Dîl bûn di hefs û zîndan

Ez li benda biryara wan

Meşa min bo daw û dozê

Ji bîrnakim biryara wan

Elend avêt roj derket

Ronî b'erd û ezman ket

Min kar û barên xwe kir

Fikr û raman tev derket

Ew roj sibehek zelal bû

Rojeke xweş biha bû

Meşiyam dilgeş û şabûm

Ji bo dîrokê amade bû

Min dil kirbû wek pola

Dest avêtim heyf û tola

Wek lehengek Angola

Ketim meydan û hola

Dixwazim herim gel wan

Birîna wan bikim derman

Bibim melhem û kewan 

Hênik bikim kezeba wan

Dema min dî birîna wan

Min mêzekir l'rengê wan

Raman û helwestê wan

Bûm evîndarê rêya wan

Dixwazim şerkim bo wan

Hilînim tola hezar salan

Biçim hewar û gazya wan

Dê rizgar kim welatê wan

Zorî li sermeye her dem

Çûm ba şît nebîyê adem

Derbasî ba rûstemê zal

Kurd dîl man in herdem

Çûm ba nebî Nûh û îdrîsa

Derbasî ba yehya û îsa

Çûm ba zekerya û mûsa 

Ketim nava dîrokan dîsa

Ma ka Selahedînê eyûbî

Şêx mehmûdê berzencî

Çûm ba mihemedê qazî

Min dîroka xwe liba wî dî

Dîroka min gelek dirêje

Tev bi keder, derd û êşe

Seyda derdê kurda dibêje

Ne serxweşe nejî sergêje

Ez çûm wî geliyê zîlan

Geryam li nava goristan

Çûm meydana çarçiran

Qêrînam gihajtî ezman

Çûm ba kardox şerefxan

Got bipirse ji hor û mîtan

Mi xwe berda birca belek

Ez gihame mîr bedirxan

Ez çûm nik Ehmedê xanî

Min gotî dîroka min kanî

Got her ba şêx Se'îdê kal

Zû bipirse ji wî qehremanî

Min ji sêx Se'îd pirs kirî

Dil û cegerê min kul kirî

Got here cem seyid riza

Wî şîretek baş li min kirî

Ez çûm ba baba Barzanî

Min got dîroka me kanî

Got here qada baxdayê

Laşê leyla birîna kêranî

Ez hatime nava helepçe

Dilê min bû parçe parçe

Çûmê zîdana Amed tarî

Tev girêbend û kelepçe

Bazdam ser gelîyê agirî

Min pirsî ye ji îhsan nûrî

Daketim çemê qesaba

Ketim nav laşên bê serî

Vegeriyan şarê Bûrsayê

Ez çûm girava îmralîyê

Li nik serokê xwe Ocalan 

Êş û jan j'min tev rijîyayê

Dil dixwaze we bêj im

Ne sax im kerr û gêj im 

Xema xwe çewa bêj im

Digerim wek dîn û gêj im

Ez ditirsim û nikar im 

Qal û behsa we bik im

Vî barê gelekî giran

Çewa ji ser xwe rak im 

Tu xwedawenda rojhilat

Şewqa we daye welat

Wekî volqana li Ararat

Bi navê we roja şadî hat

Min feyz ji Serok hilan

Pê gelek daxuyanî dan

Bû derman ji gelê kurd

Pê rohnî bû Kurdistan

Derd û kulê'm bûn gelek

Rêberê kurdan nabin yek

Rebenim her tim dibêjim

Xem û keder tev bûn yek.

Seyda Mêrdînî

                    16/03/2025