FELEK !

FELEK !

Payîze qaz û qûling, tev de çûn

Pelên dara tev zer, dar tazî bûn

Roj li me reş û tarî, wek şev bûn

Derd û kul û xem û bextên felek

Ger wek xezalê tu pir beza bî

Ya wek sîya teyran tu li ba bî

Dîsa dîsa xelasî ji bo te na bî

Lewma bûme neçîrvan ê felek

Şahî û şînên cîhanê deng dane

Ji wan re nîne tim mayîn dane

Wek kerengê hişk tu baş bizane

Eve tiştên li ber ba yê ye felek

Cîh nema ye em lê gerandin

Per û baskê me tev şikandin

Wekî erd hejê em hejandin

Eve deng û dolabên felek

Çûye payîz hatî ye zivistan

Tev de mirîne bax û bistan

Temen borî nayê ji destan

Eve zagon û qanûna felek

Wa hatin gundî ji deşt û zozan

Ketine xwarê tev pelên daran

Tev da bû li me pêtî û baran

Eve mêrg û çîmenên felek

Konê porê reş, min cuda kir

Çadira pîr û kalî, min li dar kir

Wek pişta merxê, min duta kir

Deng û awaz û zingilên felek

Wa nûbihara ciwanî tev çû

Reng û bêhna kulîlka dandû

Tev çilmisîn wek gula tî bû 

Stûxwarin li ber warên felek

Pertav qidûmê me nema ye

Bar kirin ji bo me xwîya ye

Hêvî ya me her Xweda ye

Em ketin  gêjgerîneka felek

Kihêla reş belek suwar bûm

Bi bextewar û şadûman bûm

Di talîya dawî ez pîr û kal bûm

Ezim li qad û kolanên felek

Ber û fêkîyên ji darên heyatê

Ku me anî ji bo sûk û mazatê

Êdî nema kesek bi ser de tê

Ez mame li firoş geha felek

Hatî ye li ser lêvên gurî

Temen borî na yê bîrî

Wek dixew da gurê pîrî

Hay tine ji tîr kevanê felek

Bi xem û kovan, kerr û gêjim

Rondik ji çavan xwîn  dirêjim

Bê dengim her dem dibêjim 

Ax û wax ji dest hêrsa felek

S mêrdînî, 27.12.2019