LI MALA GEL

LI MALA GEL

Zerî ya kurda kujer kirin

Çavê dayikan hêsir kirin

Dil û ceger bi xwîn kirin

Gelê kurd bi xemgîn bû

Belê xuşka deniz bi tenê

Hay tune ji daf û kemînê

Kefen bû ji elem û xwînê

Keça kurda bê haydarbû

Keça kurd û kurdistane

Neyarê hov li te mêvane

Li ser sifrê taştê û nane

Mêvan kujer te nizanbû 

Nîvçe mabû nan û taştê

Li mala gel sifra mewtê

Zeytûn û fringî û çay tê

Ê kujer kir ew mêvan bû

Didin soz û bi peymanê

Tu kes nake girî û şînê

Em ji bîr nakin te şêrînê

Heta ku welat felat bû

Tu raperîn û hevalekbû

Gelek hêja û delalek bû

Ji bo kurda şepalek bû 

Di mala xwe tu bijartîbû

Bi wijdan û bi bawer bû

Welatparêz û perwerbû

Pir jinxas û bi ceger bû 

Ji gelê xwere birastî bû

Keça kurda dilşewatbû 

Can û rihê xwe wê dabû 

Li xizmeta mala gel bû 

Bê tirs û saw l'ser karbû

Zerî ya kurdan xatir nexwest

Li goristan neda me dest

Kê te didît ew bûn sermest

Te dil li wan guvaştî bû

Emê çawa te ji bîr bikin

Zarên biçûk ji şîr vekin

Pir hewar û qîr qîr dikin 

Dil û ceger te dirandî bû

Em nikarin te ji dil derxin

Dil tijî bîr û sarinc û erxin

Kurdê çilo hevdû liberxin

Daw û doza te ji dil bû

Keça kurda canê me bû

Bi sirûd hozana me bû

Nirxê wê gelekî zêde bû

Keça kurda bi hurmet bû

Dilovaniya Xwedê lêbe

Gor ji gulşen û mermer be

Kiryar wek daxwaza wêbe

Xwişka deniz bihuştî bû

S Mêrdînî 18.06.2021